ਮੌਂਟਰੀਅਲ ਯੂਨੀਵਰਸਿਟੀ ਵੱਲੋਂ ਸਿੱਖ ਧਰਮ ਦੇ ਅਕੈਡਮਿਕ ਅਧਿਐਨ ਨੂੰ ਵੱਡਾ ਹੁਲਾਰਾ
ਫਰੈਂਚ ਭਾਸ਼ਾ ਵਿੱਚ ਗ੍ਰੈਜੂਏਟ ਪੱਧਰ ਦਾ ਕੋਰਸ ਸ਼ੁਰੂ — ਸਿੱਖ ਵਿਰਾਸਤ, ਇਤਿਹਾਸ, ਗੁਰਬਾਣੀ ਅਤੇ ਦਰਸ਼ਨ ਦੀ ਹੋਵੇਗੀ ਅਕੈਡਮਿਕ ਪੜ੍ਹਾਈ
ਮੌਂਟਰੀਅਲ, ਕਿਊਬੈਕ:(ਮਨਿੰਦਰ )ਕੈਨੇਡਾ ਦੇ ਕਿਊਬੈਕ ਸੂਬੇ ਵਿੱਚ ਸਥਿਤ ਮਸ਼ਹੂਰ ਯੂਨੀਵਰਸਿਟੀ ਆਫ ਮੌਂਟਰੀਅਲ ਵੱਲੋਂ ਸਿੱਖ ਧਰਮ ਅਤੇ ਸਿੱਖ ਵਿਰਾਸਤ ਦੇ ਅਕੈਡਮਿਕ ਅਧਿਐਨ ਨੂੰ ਅੰਤਰਰਾਸ਼ਟਰੀ ਪੱਧਰ ’ਤੇ ਨਵੀਂ ਦਿਸ਼ਾ ਦੇਣ ਵਾਲੀ ਪਹਿਲਕਦਮੀ ਕੀਤੀ ਗਈ ਹੈ। ਯੂਨੀਵਰਸਿਟੀ ਵੱਲੋਂ ਫਰੈਂਚ ਭਾਸ਼ਾ ਵਿੱਚ ਸਿੱਖ ਧਰਮ ਅਤੇ ਸਿੱਖ ਵਿਰਾਸਤ ਨਾਲ ਸਬੰਧਤ ਗ੍ਰੈਜੂਏਟ ਪੱਧਰ ਦਾ ਅਕੈਡਮਿਕ ਕੋਰਸ ਸ਼ੁਰੂ ਕੀਤਾ ਗਿਆ ਹੈ।
ਇਸ ਪਹਿਲਕਦਮੀ ਵਿੱਚ ਵਿਸ਼ੇਸ਼ ਯੋਗਦਾਨ ਪਾਉਣ ਵਾਲੇ ਮੌਂਟਰੀਅਲ ਦੇ ਕਾਰੋਬਾਰੀ ਮਾਨਯੋਗ ਬਲਜੀਤ ਸਿੰਘ ਚੱਡਾ ਅਤੇ ਉਨ੍ਹਾਂ ਦੀ ਪਤਨੀ ਮਨਦੀਪ ਰੋਸ਼ੀ ਕੌਰ ਚੱਡਾ ਨੇ ਇਸ ਨੂੰ ਸਿੱਖ ਧਰਮ ਦੇ ਅਕੈਡਮਿਕ ਅਧਿਐਨ ਲਈ ਇੱਕ ਮਹੱਤਵਪੂਰਨ ਕਦਮ ਕਰਾਰ ਦਿੱਤਾ ਹੈ। ਉਨ੍ਹਾਂ ਮੁਤਾਬਕ, ਫਰੈਂਚ ਭਾਸ਼ਾ ਵਿੱਚ ਸਿੱਖ ਧਰਮ ਅਤੇ ਸਿੱਖ ਵਿਰਾਸਤ ’ਤੇ ਗ੍ਰੈਜੂਏਟ ਪੱਧਰ ਦਾ ਅਕੈਡਮਿਕ ਕੋਰਸ ਸ਼ੁਰੂ ਹੋਣਾ ਇੱਕ ਇਤਿਹਾਸਕ ਉਪਰਾਲਾ ਹੈ, ਜੋ ਸਿੱਖ ਧਰਮ ਬਾਰੇ ਵਿਦਿਅਕ ਅਤੇ ਖੋਜ ਦੇ ਮੌਕਿਆਂ ਨੂੰ ਹੋਰ ਵਿਸ਼ਾਲ ਕਰੇਗਾ।
ਕੋਰਸ ਦੀ ਅਕੈਡਮਿਕ ਦੇਖ-ਰੇਖ ਦੱਖਣੀ ਏਸ਼ੀਆਈ ਪਰੰਪਰਾਵਾਂ ਅਤੇ ਸੱਭਿਆਚਾਰ ਦੀ ਮਾਹਿਰ ਪ੍ਰੋਫੈਸਰ ਜਾਇਨਾ ਦੇ ਮਥਰੋਵਾ ਵੱਲੋਂ ਕੀਤੀ ਜਾ ਰਹੀ ਹੈ। ਕੋਰਸ ਰਾਹੀਂ ਵਿਦਿਆਰਥੀਆਂ ਨੂੰ ਸਿੱਖ ਧਰਮ ਦੇ ਇਤਿਹਾਸਕ ਵਿਕਾਸ ਤੋਂ ਲੈ ਕੇ ਆਧੁਨਿਕ ਅਤੇ ਸਮਕਾਲੀ ਦੌਰ ਤੱਕ ਵੱਖ-ਵੱਖ ਪੱਖਾਂ ਦਾ ਅਕੈਡਮਿਕ ਅਧਿਐਨ ਕਰਵਾਇਆ ਜਾਵੇਗਾ।
ਅਧਿਐਨ ਦੇ ਮੁੱਖ ਵਿਸ਼ਿਆਂ ਵਿੱਚ ਸਿੱਖ ਇਤਿਹਾਸ, ਸਿੱਖ ਵਿਰਾਸਤ, ਸ੍ਰੀ ਗੁਰੂ ਗ੍ਰੰਥ ਸਾਹਿਬ ਜੀ ਦੀ ਗੁਰਬਾਣੀ, ਧਾਰਮਿਕ ਰਹਿਤ-ਮਰਿਆਦਾ, ਸਿੱਖ ਸਿਧਾਂਤ, ਦਰਸ਼ਨ ਅਤੇ ਸਮਕਾਲੀ ਸਿੱਖ ਸਮਾਜ ਨਾਲ ਸਬੰਧਤ ਵਿਸ਼ੇ ਸ਼ਾਮਲ ਹੋਣਗੇ।
ਮੌਂਟਰੀਅਲ ਵਿੱਚ ਸਿੱਖ ਭਾਈਚਾਰੇ ਲਈ ਵੀ ਇਸ ਪਹਿਲਕਦਮੀ ਨੂੰ ਮਹੱਤਵਪੂਰਨ ਮੰਨਿਆ ਜਾ ਰਿਹਾ ਹੈ। ਫਰੈਂਚ ਭਾਸ਼ਾ ਰਾਹੀਂ ਸਿੱਖ ਧਰਮ ਦਾ ਅਕੈਡਮਿਕ ਅਧਿਐਨ ਹੋਣ ਨਾਲ ਕਿਊਬੈਕ ਸਮੇਤ ਫਰੈਂਚ-ਭਾਸ਼ੀ ਦੁਨੀਆ ਵਿੱਚ ਸਿੱਖ ਇਤਿਹਾਸ, ਸੱਭਿਆਚਾਰ ਅਤੇ ਵਿਚਾਰਧਾਰਾ ਬਾਰੇ ਜਾਣਕਾਰੀ ਅਤੇ ਖੋਜ ਨੂੰ ਹੋਰ ਮਜ਼ਬੂਤੀ ਮਿਲਣ ਦੀ ਉਮੀਦ ਹੈ।
ਇਹ ਪਹਿਲਕਦਮੀ ਸਿੱਖ ਧਰਮ ਨੂੰ ਵਿਸ਼ਵ ਪੱਧਰ ’ਤੇ ਅਕੈਡਮਿਕ ਅਤੇ ਖੋਜ ਦੇ ਖੇਤਰ ਵਿੱਚ ਹੋਰ ਮਜ਼ਬੂਤ ਢੰਗ ਨਾਲ ਪੇਸ਼ ਕਰਨ ਵੱਲ ਇੱਕ ਅਹਿਮ ਕਦਮ ਵਜੋਂ ਦੇਖੀ ਜਾ ਰਹੀ ਹੈ।
